答李惠芳老師「雲」字个音讀

       李惠芳老師講雙溪人共只字「雲」--字讀做「în」，又閣pat聽過老勻--ê講「雲」ê古音讀做「ûn」，計是參現此tsú時主流ê音讀「hûn」無相sâng。

 

　　咱先來看幾卷韻辭書對「雲」字ê記音：

 

　　1.宋《廣韻》（1008）：雲－王分切，「王」是為母屬次濁，分是文韻平聲屬臻攝合口三等，所致現代咱ê話ê擬音是「ûn」，閣看「云」字sâng款嘛是「王分切」（ûn），註解「古文雲字」，其他ê中古韻書有記做「王分切」（《唐韻》、《集韻》），嘛有記做「于分切」（《韻會》、《正韻》），擬音iu原是（ûn）。

 

　　2.清嘉慶五年（1800）《彙音妙悟》：雲－春韻喜紐下平（hûn），云－春韻英紐下平（ûn）。

 

　　3.清嘉慶23年（1818）《彙集雅俗通十五音》：雲－君韻喜紐下平（hûn），雲/云：巾韻英紐下平（în）。

4.1873年《廈英大辭典》：地名讀「ûn」（雲霄），英語ê cloud讀「hûn」。

 

　　5.大正二年（1913）《廈門音新字典》：雲－hûn、ûn。

 

　　6.1923年《增補廈英大辭典》：地名讀「ûn」，英語ê cloud讀「hûn」。

 

　　7.昭和七年（1932）《臺日大辭典》：除了做姓參做地名讀做「ûn」，賰ê詞彙計是讀做「hûn」。

 

　　8.民國43年（1954）《彙音寶鑑》：雲－君五喜（hûn），雲－巾五英（în），云（古雲字）－君五英（ûn）。

 

　　咱頂懸uì幾卷韻辭書ê記音來看，「雲（古早寫做云）」字佇中古以前（甚至到上古）應該攏是零聲母，有可能是到近代才出現舌根擦音ê「h-」聲母，而且變做常用ê音讀；毋拄零聲母ê呼音佇清朝以來ê韻辭書攏猶閣有記錄，甚至到戰後ê《彙音寶鑑》嘛猶閣有，可見這ê音讀到今攏猶閣是「活語」，只是大部份用佇地名、名姓。

比較泉腔ê《彙音妙悟》參漳腔ê《彙集雅俗通十五音》，泉腔讀「ûn」、漳腔讀「în」，符合「-un/-in」ê泉漳韻母對應規律，另外根據昭和元年（1926）臺灣總督府官房調查課ê調查，雙溪人有九成六是來自漳州ê移民，這嘛聽好來解說（kué-serh）是按怎雙溪人會共「雲」字讀做「în」。 

　　若阮鹿港ê漢文先生，在來讀漢文ê時，計是共「雲」--字讀做「hûn」，tse也是泉腔韻書《彙音妙悟》ê傳統。

「閩」字的臺語音讀

在來咱 ê 話  ê 韻書，包括：
1800 年《彙音妙悟》（泉腔）、
1818 年《彙集雅俗通十五音》（漳腔）、
1832 年《福建方言字典》（漳腔）、
1873 年《廈英大辭典》、
1893 年《中西字典》、
1913 年《廈門音新字典》、
1931-32 年《臺日大辭典》，
以上，全部是記「閩」--字 ê 音讀為「bân」，無任何一卷記做「bîn/bín」。
《福建方言字典》前文有記載地號名【閩縣 bîn-hiān】，註解「Bân-kuān, the Bân district.」，可見伊是共「bîn」當做「閩」ê 文讀音；毋拄《福建方言字典》內文ê字音，【閩】--字 iu 原是孤收「bân」，無收「bîn」。
　　會共「閩」讀做「bîn」--ê，來源是中古 kàu 明朝 ê 韻書「【廣韻】武巾切無分切【唐韻】武巾切【集韻】【韻會】眉貧切【正韻】彌鄰切，𠀤音珉。」「bîn」毋是漳泉話在來 ê 主流音讀。若是浙南 ê 洞頭、蒼南、平陽，亻因是照中古韻書 ê 反切讀做【閩南 bîn-lâm】，總--是，亻因在來是說做【福建話】，並無說【閩南話】只个名詞，現代浙南 ê 閩南語講做【閩 bîn】，論真，也是路尾 ê 人照反切ê後起切音。

     「閩」--字是臻攝開口三等，臻開三在來咱 ê 話就有 /-a/ ê 韻母，可比講【陳 tân】、【鱗 lân】、【趁 thàn】、【呻 tshan】、【貧 pân】、【密 ba̍t】、【漆 tshat】、【蝨 sat】，「閩、密、蝨」ê 客話分別是「mén、me̍t、set」。「閩」--字讀做「bân」，本底是在來咱 ê 話 ê 正讀，權算是白讀棧。
　　另外，部份人讀做「bín」--ê，是誤讀做【閔 bín】--字--去。

「權」--字 ê 音讀

中古濁聲類，泉州、漳北一般讀做無送氣 ê 字，漳南有 ê 確實是會讀做送氣。目今一般 ê 臺語人（掛臺語專家）pōo-pîn 干焦知影【權】讀做「khuân」。早期傳統韻書計收無送氣，現 tsú 時絕大多數 ê 臺語人計講送氣，造成遮爾大 ê 演變，欲講是漳南 ê 遺留（漳南有共【權】讀做送氣 ê「khuân」），嘛袂用得講無可能，總--是，若有，照講嘛是屬極少數。

送氣 ê「khuân」拍算是日本時代 tsiah tāu-tāu 出現 ê 新音。【權】--字，在來咱 ê 話日本時代中期進前 ê 韻書，計孤收無送氣，到日本時代中期 ê《臺日》tsiah 出現送氣 ê 記錄，uì《臺日》ê 記音來看，唯一兼收送氣 ê「職權」、「權利」兩个詞，計是借自日本話 ê 臺語外來詞，其他有「權」ê 詞彙計是孤收無送氣 ê「kuân」。

在我 ê 淺見，臺灣人後--來多數共「權」--字讀做送氣 ê「khuân」，應該是因為日本字音 ê 因端，有可能是受著日本話「權(けん)」送氣音 ê 影響，kap「哲(てつ)」讀做「thiat」ê 情形 sâng 理路。

「嗣」--字个音讀

「嗣」--字：

1.中古韻書《唐韻》、《集韻》、《韻會》：「𠀤祥吏切，音飼。對應近現代咱个話是陽去个「sū/sīr」。

2.咱个話上早个韻書1800年泉腔个《彙音妙悟》，記做陽平个「sîr」，無收陽去个音讀。

3.1818年漳腔个《彙集雅俗通十五音》，陽平个「sû」、陽去个「sū」計有收

4.1832年漳腔个《福建方言字典》，陽平个「sû」、陽去个「sū」計有收。

5.1873年个《廈英大辭典》，陽平、陽去兩音計有收，陽平个「sû（泉sîr）」記做白讀棧、陽去个「sū（泉sīr）」記做文讀棧。

6.1913年个《廈門音新字典》，陽平、陽去兩音計有收，陽平个「sû」記做白讀棧、陽去个「sū」記做文讀棧。

7.1931-32年个《臺日大辭典》，陽平、陽去兩音計有收，陽平个「sû（sîr）」收17條詞目，其中一條加註是文讀詞彙，陽去个「sū（sīr）」收2條詞目，計加註是文讀詞彙。

《教典》對「正音」个解釋是『指符合中古反切所切出來的音』，所致照中古反切是陽去个「sū/sīr」，陽平个「sû/sîr」因為無合中古反切，所致《教典》就共伊當做俗讀。總--是，只个「sû/sîr」佇咱个話个韻書已經真有歷史--囉！佇西元1800年，咱个話上早个韻書《彙音妙悟》就已經有陽平个記錄，後--來个《廈英》、《甘字典》計共伊當做是白讀棧（《臺日》原則上也是按呢）。

字姓「鄒」ê音讀

   「鄒」只个字姓，在來咱 ê 話 ê 韻書收錄如下：

1800年《彙音妙悟》（泉腔）：爭高上平、爭鉤上平。

1818年《彙集雅俗通十五音》（漳腔）：爭沽上平、爭稽上平。

1873年《廈英大辭典》：「tsoo」。

1894年《Ē-MN̂G IM Ê JĪ-TIÁN》：「tsoo」。

1913年《廈門音新字典》：「tsoo」。

1931年《臺日大辭典‧上冊》：「tsoo」。

　　以上除起《彙音妙悟》以外，計有註明字姓音。教育部《臺灣閩南語常用詞辭典》收「Tsau」、又音「Tsoo」，「Tsau」只个音讀不見於前述在來 ê 韻書，收佇張屏生教授調查 ê《高雄閩南語話彙集》，2019年一个來參加朗讀夏令營 ê 學生鄒承諺（重慶國中），伊講亻因就是姓【鄒 tsau】。我現 tsú 時服務 ê 學校臺北市永建國校，有一个同事就是姓【鄒 tsoo】，臺灣也有人是姓【鄒 tse】，就是《雅俗通》ê〈稽〉韻，權算是漳北音。

　　另外，只个字姓嘛有人讀做「tsiu」，只一音照講是來自中古韻書《廣韻》ê「側鳩切」（莊母尤韻）。

　　「鄒」--字，《彙音妙悟》收佇〈高〉、〈鉤〉兩韻，〈鉤〉韻就是現代泉府腔只个字姓所讀 ê「tsio」，毋拄有 ê 新泉腔又閣產生新 ê 變體「tso」，《當代泉州音字彙》就是記「tso」。對應《十五音》的〈沽〉韻，「tsio、tsoo」是咱 ê 話〈鉤沽文〉韻類 ê 對應規律，曲音/-iro/、泉音/-io/、漳同廈音/-oo/、永春老派/-eru/、永春新派/-er/。《彙音》〈高〉韻 ê「tsoo」較特別，因為〈流開三〉涵字佇《彙音》讀〈高〉韻--ê，但(niǎ)「鄒、皺」兩字，因此著算是特字，也有可能是官話音。

        路尾銅山何煒閣報我知，詔安有一个姓「鄒」ê 鄉里「介里」，在地人讀做「tsiau」。

　　所致「鄒」只个字姓，計共九音（非生活語言 ê 曲音先不論）：「tsoo(漳南是tsou)」、「tsio」、「tse(漳北)」、「tsiu」、「tsau」、「tso」、「tseru」、「tser」、「tsiau」。