【愁】--字，《彙音妙悟》收佇〈鉤〉韻〈出〉母，曲音-ɯo，新泉音-io，新新泉音-o，同廈漳音-ɔ，老永春音-əu，新永春音-ə，潮汕話-ou，毋拄讀做/-ɔ/--ê，實際生活中敢若無人聽過，孤《閩南方言大詞典》收漳泉廈正讀「tshôo」。
《彙音雅俗通十五音》、《福建方言字典》無收【愁】。
《廈英》、《甘字典》收「tshiû」，惠來部份所在也讀「tshiû」，王育德博論認為是「秋」的類推形。
當今泉州話口語也有讀做「tshiû」(ex.《當代泉州音字彙》)，曾南逸主張是同安腔 ê 影響，毋拄 DP 孫--先主張是吟詩叶韻來--ê，ex.《將將酒》：「呼兒將出換美酒，與爾同銷萬古愁。」野有理氣。
在來 ê 文獻無「siû」ê 音讀。